Сарæзтой Иры мыггæгты Ныхас (Газета «Пульс Осетии» №24, июнь 2018)

Ирыстоны мин мыггагæй фылдæр ис. Уыдонæй бирæтæн ис «Мыггаджы Ныхас». Уым хистæртæ фæхæссынц уынаффæттæ, фæдзурынц сæ абон æмæ сомбоныл, фæкæнынц кæстæртимæ хъомыладон куыст, ирондзинад æмæ сæ фыдæлты уидæгтæм æввахсдæр кæнгæйæ. Цы ма уа хуыздæр мадзал фæлтæрты ‘хсæн бастдзинæдтæн?

«Иры Стыр Ныхас»-ы бындурыл тынг зæрдиаг æмæ хъæппæрисджынæй кусынц, абоны онг йæ мыггаджы Ныхас кæмæн ис, уыцы арфæйаг хистæртæ, æвзæрст лæгтæ. Мыггæгты комитеты сæргълæууæг Æгкацаты Юри архайы, цæмæй алы мыггаджы дæр уа Ныхас, мыггаджы куырыхон æмæ æгъдауджын хистæртæ кусой сæ кæстæртимæ. Ныр дæр «Иры Стыр Ныхас»-ы уыд мыггæгты минæвæртты уæрæх æмбырд. Æрдзырдтой сæ дарддæры иумæйаг куыстыл, мыггæгты æхсæн цы ахсджиаг фарстатæ ис, уыдоныл æмæ æндæр фарстатыл.

Рагæй нырмæ æхсæнады царды мыггагыл стыр хæс æвæрд уыд. Мыггаджы куырыхон хистæртæ кæстæртимæ цы хъомыладон куыст бакæной, уый иунæг скъола æмæ институт дæр нæ бакæндзæн. Дзæгъæлы-иу нæ бафарстой нæ фыдæлтæ адæймаджы фыццаг йæ мыггагæй, уый фæстæ та йæ номæй. Уымæ гæсгæ абон дæр, хъомыладон куыст кæнгæйæ, алкæйы дæр фыццаджыдæр æнцой кæнын хъæуы йæ мыггаджы Ныхасы хистæрты фæлтæрддзинад, фарн æмæ зонындзинæдтыл.

Съезды уынаффæтæм гæсгæ «Иры Стыр Ныхас»-ы Координацион совет сфидар кодта Иры мыггæгты минæвæрттæй Ныхас саразын. Уырдæм алы мыггагæй дæр æвзæрст æрцæудзæн иу дзырддзæугæ лæг. Уыцы хъуыддаг саразынæн Æппæтадæмон æхсæнадон змæлд «Иры Стыр Ныхас»-ы сæргълæууæг Кучиты Руслан радта дæс боны æмгъуыд. Цы мыггаджы нæй Ныхас, æвзæрст лæг, уыдонæн бар нæй «Иры Стыр Ныхас»-ы тæрхонтæ æмæ уынаффæтæ хæссынæн. Кучиты Руслан куыд загъта, афтæмæй «Стыр Ныхас» дарддæр дæр кусдзæн, йæ мыггаджы ‘хсæн йæхи æгъдауджынæй чи равдыста, уыдонимæ. Мыггаджы ‘хсæн æгъдау сæвæрын йæ бон цы хистæрæн нæу, уый æнæхъæн Ирæн куыд хъуамæ уынаффæтæ кæна.

Алы мыггаг дæр хъуамæ равзара иу дзырддзæугæ, æгъдауылхæст лæг, æмæ уыдонæй сфæлтæрдзæн «Иры Стыр Ныхас»-ы Тæрхон. Ууыл дзырдæуыд раздæр дæр дзыллон хабархæссæг фæрæзты, адæмимæ фембæлдтыты. Æмæ сæ хъуыды цæрджыты зæрдæмæ фæцыд.

Цавæр тæрхоныл цæуы ныхас? Цæуыл æнцой кæндзæн?

Тæрхоны лæгты размæ лæудзæн хæс, ирон æгъдауы сæрты ахизгæйæ стыр æнæгъдаудзинад чи равдиса, адæмæн йæ æбуалгъ митæй знаггад чи хæсса, уыдонимæ кусын. Йæ иннæ хæс уыдзæн адæмы ‘хсæн хæлардзинадыл кусын, фидауын сæ кæнын, цы хъаст сæм бахæссой, уый равзарын. Бæлвырд куыд у, афтæмæй адæм ныридæгæн дæр арæх æрбацæуынц æххуысагур, рæстдзинадагур «Стыр Ныхас»-мæ. Тæрхоны дзырддзæугæ лæгтæ фидауын кæндзысты туджджынты дæр. Бинонты ‘хсæн арæх цы хъаугъа рауайы, уый аххосæй бирæтæ ахицæн вæййынц, фылдæр хатт сæ фарсмæ фæлтæрдджын, зондамонæг хистæртæ сæ цæстуарзон ныхас, сæ арф хъуыдытимæ кæй нæ балæууынц, уый аххосæй дæр. Тæрхоны лæгтæ архайдзысты дзыхы ныхасæй, зæрдæйы ахастæй, цæстуарзон уынаффæтæй архайыныл. Фæлæ уыдоны сæрты дæр чи ахиза, уыдонæн та, цы мыггагæй сты, уыдон рахæсдзысты хъодыйы тæрхон – нал сын салам дæтдзысты, нал сæм сæ хъыгмæ дзурдзысты, нал сæ сæ цинмæ хондзысты. Æмæ ма адæймагдзинады æууæлтæ кæмæ баззад, уымæн уымæй стырдæр æфхæрд цы хъуамæ уа!

Æмбырды иннæ фарста уыд, Мæздæджы районы «Стыр Ныхас»-ы хайады сæрдар Гуцъаты Фридоны хъуыды æмæ хъæппæрисæй цы орден бацæттæ, «Адæмы хорзæх», зæгъгæ, ууыл бæстондæр æрныхас кæнын, лæмбынæгдæр ыл ахъуыды кæнын. Лæвæрд цæудзæн «Стыр Ныхас»-ы номæй афæдзы кæрон, ирон адæмæн йæ хорз хъуыддæгтæй стыр лæггæдты чи бацыд, уыдонæн.
Æмбырды раныхас кодтой Кучиты Руслан, Æгкацаты Юри, Багаты Васили, Гæлæбуты Мухарбег, Гокъоты Витали, Уырымты Петя, Касаты Георги, Цорæты Мухарбег, Кцойты Гермæн, Гуцъаты Фридон, Моргуаты Эдислав æмæ иннæтæ.

Бауынаффæ кодтой, иннæ æмбырды цы фарстатыл æрныхас кæндзысты, ууыл. Уыдонæй иу у иумæйагæй ирон бæрæгбæтты къæлиндарыл бакусын æмæ йæ сфидар кæнын. Дарддæр дæр Мыггæгты комитеты размæ лæууы стыр æмæ вазыгджын хъуыддæгтæ. Мыггæгтæй Ныхас саразын кæмæн нæма бантыст, уыдонæн дæр ахсджиаг хъуыддагыл нымад æрцæуид ацы арфæйаг хистæрты бафæзмын, Ирыстоны мыггæгты Ныхасты фæлтæрддзинадыл æнцой кæнгæйæ. Мыггаг мæсыг у!

Æппæтадæмон æхсæнадон змæлд
«Иры Стыр Ныхас»-ы пресс-службæ

Комментарии

Комментарии к данной статье отсутствуют

Добавить свой комментарий

Ваше имя:
Код:
Комментарий: