Цард нæ куыд ницæуыл ахуыр кæны  (Газета «Пульс Осетии» №52, декабрь 2017)

Гуырдзыстоны президент Саакашвилийы хæстмондаг æрдонгтæ Хуссар Ирыстонмæ куы æрбалæбурдтой, ууыл 2018 азы сæххæст уыдзæн дæс азы. Уый стыр гадзрахаты ми уыд гуырдзиæгтырдыгæй, фæлæ дзы абоны онг ирон адæмæй хатыр ничима ракуырдта. Уый нæ, фæлæ Республикæ Хуссар Ирыстонимæ – Паддзахад Аланиимæ – сæ ахастдзинæдтæ фæхуыздæр кæныныл дæр нæ архайынц. Сыхагимæ хæларæй цæрыны уаджы тыххæй семæ иу бæрнон, бæлвырд бадзырд дæр нæма сарæзтой.

Зæрдæдарæн нæй цæгаты нæ иннæ сыхæгты – мæхъæлы – ахастдзинæдтыл дæр. 1992 азы 30 октябры нæм æнæнхъæлæджы æрбабырстой. Горæтгæрон районы æмæ Дзæуджыхъæуы цæрæг ирæттæй бирæ амардтой, уацары акодтой, æбуалгъ митæ бакодтой. Фæлæ сæ, абоны онг йæ митыл фæсмон чи бакодта, ахæмæй нæ уынæм.

Уый хыгъд ирæттæй Хуссары дæр æмæ Цæгаты дæр гуырдзы æмæ мæхъæлы роны абырынмæ чи хъавы, ахæмтæ – бирæ. Цард нæ куыд ницæуыл ахуыр кæны? Куыд барон æмæ хæларзæрдæ адæм стæм? Нæ алыварс адæмтæ ахæмтæ не сты, æмæ уый у не сæфты фæндаг – цард лæмæгътæн нæ бары. Нæ фыдæлтæ дæр, абон сæрæстыр кæмæй стæм, уыдон: скифтæ, сæрмæттæ, алантæ, æвæццæгæн, ахæмтæ уыдысты æмæ ма сæ аззад армыдзаг ирон адæм.
Æз афтæ нæ зæгъын, сыхагимæ хæларæй, æууæнкджынæй цæрын нæ хъæуы, зæгъгæ. Фæлæ дæм уый цы зæрдæ дары, цы зондахаст æм ис, уый зон æмæ йемæ дæ сыхагдзинад уыцы уавæртыл араз. Дæ сæрыл сæ ма бадын кæн. Дæхи зон! Чидæртæ нæ сæхи равдисыны охыл сæ мады дæр дидтой рахондзысты. Афтæмæй та ирон æмбисонд афтæ амоны: «Йæ мады дидтой ничи хоны». Алцæмæн дæр бæрц æмæ æгъдау ис.

Уый афтæ куынæ уаид, уæд та нæм ныридæгæн гуырдзы æмæ мæхъæлы сæрылхæцджытæ, сæ сæрыл гæпгæнджытæ нæ фæзындаид. Ирон адæм хæларзæрдæ адæм сты, хатыргæнаг æмæ та семæ, сыхагæн куыд æмбæлы, ахæм цардыл ныххæцдзысты. Фæлæ уал сæ бауадз, фæгæдзæ кæн, сæ мæрдты ингæнтыл кæрдæг æрзайа, сæ масты къуыбылой фæкъаддæр уа. Ивылд цæугæдоны сæрты сæ кæдæм хизын кæныс?! Цæмæй иууылдæр донласт фæуæм?! Æрсабыр уал уа. Интернеты уæддæр бакæс, мæхъæл Горæтгæрон хъæуты тыххæй цытæ фыссынц, цæуылты, кæуылты хъуыды кæнынц, цы фæндтыл хæст сты. Сæхæдæг быдыры нæ фыдæлты зæххыл цæрынц, афтæмæй.

Дæ сыхаг йæ хъæддаг митыл фæсмон куынæ фæкæна, афтæмæй йын сæ куы барай, уæд хъæхъхъагдæр кæны, æфсæрмы дæ нæ кæны, ницæмæ дæ дары. Æмæ дын цæмæй аргъ кæна, нымайа дæ, уый тыххæй дæхи зон. Æфхæрд æмæ рæвдыд хъуыддагæн дæр дзуапп раттынмæ цæттæ у! Хæлиудзых æмæ алкæмæн хæрынæн ма бæзз!
Мах, ирон адæм, иннæ адæмтимæ хæларæй цæрын уарзæм æмæ зонæм. Стыр уырысимæ нын хæлар ахастытæ ныффæдзæхстой нæ фыдæлтæ, æфсымæртæ нæ хонынц абхазæгтæ, хæлар сыхæгтæ стæм кæсæгимæ, балхъаримæ, цæцæнимæ, Дагестаны алы адæмтимæ æмæ иннæтимæ. Ахæм цардæй цæрын базондзыстæм иннæ адæмыхæттытимæ дæр, фæлæ нæм марынмæ чи æрбацæуа, уымæн йæхи мард ласинаг фæуыдзæн! Цæваг галæн йæ сыкъа сæттаг у.

Цгъойты Хазби

Комментарии

Комментарии к данной статье отсутствуют

Добавить свой комментарий

Ваше имя:
Код:
Комментарий: