Дæ бон хорз, мæ буц хистæр Æхсар! (Газета «Пульс Осетии» №49, декабрь 2017)

Æрæджы, бынтон æнæхъæлæджы, кæмæйдæр базыдтон, Дæ юбилей кæй уыди, уый. Фæстæдæр мын бæлвырддæр ныхас загъта Хозиты Петъи. Ацы хъуыддаг рæстæгыл кæй нæ базыдтон, уый мæнæн дæр, æмæ чи зоны æнæхъæн Хуссар Ирæн дæр, не ‘гуыдзæгдзинадыл дзурæг у!
Æрæджиауы хорзæхау Дæм æрвитын мæ арфæйы ныхæстæ! Кæддæриддæр æнæниз æмæ амондджын у! Ирыстонæн, ирон адæмæн Ды цы лæггæдтæ фæкодтай, уыдон æвидигæ сты. Хуыцау нын ахæм амонд раттæд, цæмæй сæ бамбарæм æмæ сæ рох ма кæнæм!

Мæнмæ гæсгæ, Ды дæ Ирыстоны тæккæ хуыздæр поэттæй иу! Ды поэзийы бæрзæндтæм цы фæндæгтыл ацыдтæ, уыдон æгæр зын, æгæр дурджын уыдысты. Фæлæ, Дæ фæстæ чи цыд, уыдоныл дуры зæйтæ уадзыны бæсты, Ды бавдæлдтæ ирон адæмæн йæ фæндаг æхсæдынмæ. Цард Дæ йæ дæрзæг æрмтты цас фылдæр æууæрста, уас фидардæр кодтай. Царды тæрæнты бахаугæйæ, Ды хъаст-хъыллист кæнын Дæ сæрмæ не схастай, фæлæ Дæ зонд, Дæ хъару цас амыдтой, уымæй размæ ссæстай. Алкæй бон нæу ахæм удуæлдай куыст кæнын, фæлæ сомбоны фæлтæрæн, Дæ фæдыл цæугæйæ, æнцондæр уыдзæн, æмæ Дын кæддæриддæр Дæ ном, нарты Батырадзы номау, мысдзысты!

Абон алчи нæма æмбары, Дæ тохы сæр цы у, уый. Цы гæнæн ис! Къостайы дæр йæ рæстæджы алчи не ‘мбæрста. Цас фылдæр рæстæг рацæуа, уас Дæ ном, сæумæйы хурау, бæрзондæй-бæрзонддæр цæудзæн Ирыстоны арвыл, æмæ æрмæстдæр фæстагæттæн бантысдзæн Дæуæн æмбæлон аргъ скæнын!

Æз арæх фæхъуыды кæнын: цымæ чи сæвæрдта Дæуыл, науæд Къостайыл, науæд Абайты куырыхон ахуыргондыл, стæй бирæ æндæр намысджын тохгæнджытыл æнæхъæн адæмæн лæггад кæныны уаргъ? Цас хуыздæр райдыдтон æмбарын царды лыстæг фæзилæнтæ, уас мæм фылдæр райдыдта хъарын, зæгъгæ, уыцы уаргъ адæймаг йæхæдæг равзары йæхицæн, йæхæдæг æй сæвæры йе ‘’ккой. Уый æцæг ирон лæгæн йæ туджы ис – хорз лæг йæ хъæубæстæйæ хæс дары, зæгъгæ, куы зæгъы ирон æмбисонд. Ды æмæ Дæхуызон адæм та æнæхъæн Ирыстонæй, æнæхъæн адæймагадæй дæр цыма хæс дарут, афтæ хатут уæхи.

Бирæ дын бантыст, Æхсар, дæ уæззау фæндæгтыл, ноджы фылдæр Дын цы бантыса, уыцы арфæ Дын Стыр Хуыцау йæ зæдтимæ ракæнæнт!
Мæнæн та ныббар мæ æнæрхъуыдыдзинад! Чи зоны Дæ нæуæдз азы, стæй та Дæ сæдæ азы юбилейы мæхи хуыздæр равдисон.

Дæ хордзинадмæ бæллæг
Дзицц-мæличчы фырт Юри

Комментарии

Комментарии к данной статье отсутствуют

Добавить свой комментарий

Ваше имя:
Код:
Комментарий: