Дзуæрттæн лæггадгæнджыты æмæ кувæг лæгты сидт Ирыстоны  (Газета «Пульс Осетии» №41, октябрь 2017)

Нæ рагфыдæлтæ куывтой нозты æгъдауæй бæгæныйæ, къуымæлæй. Сывæллæттæн та, Мады Майрæм-тæ куыд агуырдтой, афтæ æхсырæй дæр куывтой.
Бæгæны сæрмагондæй кодтой стыр Дзуæртты бын, уыдис, бæгæны кæм кодтой, ахæм сыгъдæг бынæттæ, æмæ бæгæны фыхтой уыцы бынаты. Уыцы бынаты конд бæгæны уыдис уæларвон тыхтæй хайгонд. Бæгæны фыхтой кæддæриддæр нæлгоймæгтæ, æххуыс сын кодтой дон хæссынмæ æрыгон чызджытæ, чындзыцыд чи нæма уыд, ахæмтæ. Дон хастой суадонæй. Бæгæны чи фыхта, уыдон архайдтой, цæмæй хъæр ныхас ма скæной, ууыл. Тарстысты, кувинаг бæгæны æфхæрд куы баййафа, уæд йæ уæларвон тых кувæджы куывды фæстæ лæмæгъ кæны, зæгъгæ.
Кувæггаг чъиритæ æмæ нывонд, кувинаг хæйттæ дæр хъахъхъæдтой афтæ. Ахæм сыгъдæг кувинæгтæй Дзуары лæггадгæнæг, халæй æвзæрст чи у, уый, Хуыцауы ном куы ссара, уæд, æнæмæнг, Дзуар кæны æххуыс. Афтæ куывтой нæ рагфыдæлтæ. Карз нозт – арахъхъ – æввахс нæ уагътой кувæндонмæ. Хуыдтой йæ хæйрæджы дон æмæ, афæдзы кæрон хæйрæджыты æхсæв куы вæййы, уæд сын сæхи нозтæй сæ ном уыцы æхсæв ссарынц.
Арахъхъæй ма рухсаг фæзæгъынц ас адæймагæн дæр, æцæг бæстæм чи ацыди, уымæн. Фыдæлтæ йæ зыдтой, æцæг бæстæм ацæуæгæн йæ фæндаг сау дунейыл кæй уыдзæн, уый. Уым та сау тыхтæ æмæ дæлимонтæ хицауиуæг кæнынц.
Курдиат Ирыстоны адæммæ, йæхи ирон чи хоны, уыдонмæ: курæг стæм, æхсæнадон организаци «Иудзинад»-ы, «Ирыстоны дзуæртты æмæ кувæндæтты лæггадгæнджыты Совет»-ы номæй, «Иудзинады Хистæрты Ныхас»-ы номæй, мауал хæссут карз нозтытæ Дзуæрттæм æмæ Кувæндæттæм. Мауал кувут Хуыцау æмæ йе сконд Зæдтæм æмæ Дуæгтæм карз нозтæй. Нæ куывд гъеуæд Хуыцаумæ хæццæ кæндзæн, æмæ Ирыстон фæрнæйдзаг уыдзæн.
Фидаргонд æрцыд «Дыккаг Æппæтирыстоны
Мыггæгты Форумы», 2017азы рухæны мæйы 19 бон

(Интервью с председателем правления «Иудзинад» Батразом Кучиевым читайте в следующем номере.)

Комментарии

Комментарии к данной статье отсутствуют

Добавить свой комментарий

Ваше имя:
Код:
Комментарий: