Арфæйаг кæстæр (Газета «Пульс Осетии» №28, июль 2017)

Æвдыст æрцыдис Хуссар Ирыстоны Джусойты Нафийы номыл паддзахадон литературон премимæ

Ирон æвзаг æцæгæйдæр мады ад кæмæн кæны, йæ цард æмæ йæ зонд йæ мадæлон æвзагæн чи не ’вгъау кæны, уыдонæй иу у журналист Гасанты Валери.
Уæд æз куыстон Сывæл-лæтты сфæлдыстады галуаны ирон æвзаджы методистæй. Æппæт хъарутæй дæр архайдтон сывæллæттæн сæ мадæлон æвзаг уарзын кæныныл. Æмæ нын æнтысгæ дæр кодта.
Иу бон мын мæ кусæн уаты дуар чидæр æрбахоста. Дуар байгом æмæ дзы чи æрбахызт, уымæн йæ цæсгом хурау худти, нæ бафæрæзта йæ зæрдæйы æнкъарæнтæ бауромын. Мæнæ, дам, рагæй цæмæ бæллыдтæн, уый куыд æрцыд. Æмæ рæсугъд хъæлæсæй базарыд. Уый уыд уæды скъоладзау Гасанты Валери. Æз ахæм сыгъдæгзæрдæ, цæстуарзон, курдиатджын лæппуйыл куыннæ хъуамæ бацин кодтаин. Афтæ райдыдта нæ сфæлдыстадон куыст. Фыссын райдыдта æмдзæвгæтæ, архайдта галуаны мадзæлтты. Йæ фыццаг æмдзæвгæ «Хостыхъоты Зинæйы номарæн» ныффыста 1995 азы скъоладзау уæвгæйæ.

Хъуыды ма йæ кæнын, фыццаг хатт Валери сценæмæ куы цыд, уæд куыд тынг тыхст: æфсæрмы кодта. Æз ын зæрдæтæ æвæрын, ма тыхс, æз фæссценæ дæумæ хæстæг лæудзынæн, зæрдæйы хос ын радтон. Куыддæр йæ ном фехъуыста, афтæ ма мæм фæстæмæ фæкаст, æз æм мæ сæр разыйы тылд бакодтон, æмæ рахызт сценæмæ… Аив бакасти йæхи фыст æмдзæвгæ. Залы адæмæй къух бакæнæн нæ уыд, æмæ йæ тынг сбуц кодтой сæ къухæмдзæгъдæй. Валерæйæн йæ цæстытæ доны разылдысты. Æз та йыл фæссценæйæ цин кодтон. Арæх æрымысæм ацы цау. Уæд, дам, фæстæмæ дæ цурмæ куыд рацыдтæн, уый æмбаргæ дæр нæ бакодтон. Валерæйы æз уæд хуыдтон, стæй йæ абон дæр хонын «ходячая энциклопедия». Ирыстоны фысджытæй йæ кæмæйфæнды дæр бафæрс æмæ дын йæ биографи радзурдзæн афтæ бæлвырд, раст цыма йемæ зонгæ уыд. У тынг зæрдæргъæвд лæппу!

Галуаны кусгæйæ Валери мæнæн уыд тынг æххуыс. Иумæ-иу арæзтам фембæлдтытæ фысджытимæ, ирон театры артисттимæ. Диссаджы мысæн изæр скодтам Гуыцмæзты Алешæн. Ног азы бæрæгбон ирон æвзагыл…
Скъолайы фæстæ ахуырмæ бацыд ЦИПУ-йы ирон филологийы факультетмæ æмæ йæ æнтыстджынæй каст фæци. Мæ хъус дардтон йæ ахуырмæ уым дæр. Тынг мæ фæндыд, цæмæй дзы рауадаид хорз специалист.
Æмæ нæ фæрæдыдтæн! Радиойы æмæ на уарзон газет «Рæстдзинад»-ы бацахста аккаг бынат æмæ дзы зæрдиагæй кусы. Поэзийы уæндон къахдзæфтæ кæны, йæ фыст æмдзæвгæтæ, зарджытæ сты фæлгонцджын, зæрдæмæ хъарынц.
Валерæйæн стыр аргъ кодта нæ куырыхон хистæр, дзæнæты бадинаг Джусойты Нафи. Арæх ын-иу афтæ дзырдта, тæхуды æмæ, дам, дæ раздæр куы базыдтаин æмæ, дам, дæм истæмæй мæ цæст куы фæдардтаин.
Газет «Рæстдзинад»-ы арæх зæрдиагæй бакæсын Валерийы æрмæджытæ. Фыст вæййынц æнцон æмбарæн, лæгъз æвзагыл арф хъуыдыимæ. Кæй тыххæй фæфыссы, уый сурæт афтæ рæсугъд раргом кæны, æмæ йæ куы нæ зонай, уæд дæ бафæнддзæн йемæ базонгæ уæвын.
Фæнды мæ, цæмæй Валери архайа Джусойты Нафийы номыл конкурсы, уый аккаг у.

СÆЛБИТЫ Иринæ,
РЦИ-Аланийы сгуыхт ахуыргæнæг,
УФ-йы ахуырады кадджын кусæг,
Колыты Аксойы номыл республикон премийы  лауреат, Дзæуджыхъæуы Хетæгкаты Къостайы номыл 13-æм астæуккаг скъолайы директор

Комментарии

Комментарии к данной статье отсутствуют

Добавить свой комментарий

Ваше имя:
Код:
Комментарий: