Нæхи Аслæнбег (Газета «Пульс Осетии» №27, июль 2017)

Куыд æхсызгон вæййы, æвæдза, газет-ты фæрстыл адæймаг куы бакæсы кæнæ телевизорæй куы радзурынц хорз адæймаджы тыххæй, уæд.

Æрæджы телевизорæй æвдыстой Хъуылаты Земфирæйы программæ «Зæрдæмæ фæндаг». Уым Земфирæ ныхас кодта нæ адæмæн уарзон газет «Рæстдзинад»-ы сæрмагонд уацхæссæг Касаты Аслæнбегимæ.

Равдысты фæлгæтты цас рæсугъд ныхæстæ фæкодтой Черчесты Хъасболат, Баскаты Уы-рызмæг, Битарты Маринæ æмæ Земфирæ йæхæдæг нæ сыхы рæзгæ фæлтæры хуыздæр минæвæрттæй иу Касаты Аслæнбеджы тыххæй.

Мах, Аслæнбеджы сыхæгтæ, уайтагъд кæрæ-дзимæ телефонæй дзурæм, кæд телевизормæ нæ кæсыс, уæд бакæс, зæгъгæ. Куыд æхсызгон уыдис уыцы æцæгдзинады равдыст махæн — æгас сыхбæстæн.

Нæхи Аслæнбег æрмæст куысты хорз лæппу нæу, сыхбæсты дæр ахæм у.
Сыхбæсты цыфæнды хабар куы вæййы, цинæй уа, зианæй, уæд Аслæнбег алкæй фарсмæ дæр балæууы æмæ, цалынмæ хъуыддаг кæронмæ ахæццæ вæййы, уæдмæ цырагъдарау, зивæг нæ зонгæйæ йæ фыдæбоны хай бакæндзæн.

Алкæйы зæрдæ балхæнын дæр зоны. Ас адæм кæрты кæнæ уынджы куы фæбадынц, уæд сæ цурты ницы хуызы ацæудзæн, æппындæр æй куы не ’вдæла, уæддæр сæ цуры алæудзæн, хъæлдзæг ныхæстæ сын акæндзæн. Тынг бирæ уарзынц Аслæнбеджы сыхбæстæ зæрондæй, сывæллонæй.
Кæд кармæ гæсгæ хæрз æрыгон у, уæддæр сыхы мидæг куы бахъæуы, уæд алы хъуыддагмæ дæр йæ ныфс бахæссы. Суанг ма зианы ха-бæртты дæр æрлæууы куырыхон лæгау æмæ дзы хорз, рæсугъд æгъдау ратты.

Мах, æгас сыхбæстæ дæр, Аслæнбеджы цырддзинадмæ кæсгæйæ, йæ уæздан æмæ арæхст дзырдмæ хъусгæйæ, иууылдæр дисы бацæуæм, ахæм æрыгон уæвгæйæ ирон æгъдауы домæнтæ афтæ хорз куыд зоны, зæгъгæ. Йе сæ хъуыды та куыд бакæны.

Æцæгæлонæй мах сыхы чи вæййы æмæ йæ чи фены, уыдон уый фæстæ алы рæттæй дзурын райдайынц, уый кæй лæппу у, зæгъгæ. Нæ сыхы иннæ сæрæнгуырд лæппутæ исты хъуыддаджы фæдыл куы фæцæуынц, уæд хъазгæйæ фæзæгъынц: «Аслæнбег кæд цæуы, уæд цæттæ стæм».

Тæхуды, Аслæнбеджы хуызæн лæппутæ нæм фылдæр куы уаид Ирыстоны, уæд нæ кад æмæ нæ рад цас бæрзонддæр уаиккой…
Сыхбæсты номæй

ХОДЫ Зинæ

Комментарии

Комментарии к данной статье отсутствуют

Добавить свой комментарий

Ваше имя:
Код:
Комментарий: