Чердæм цæуæм?  (Газета «Пульс Осетии» №19, май 2017)

15 майы Ирыстоны бæрæг кодтой ирон æвзаджы бон. Кæй зæгъын æй хъæуы, æхсызгон кæм нæ у ирон адæймагæн ацы хъуыддаг. Газеттæ, журналтæ, телеуынад æмæ радио радтой рæсугъд æмæ цымыдисаг æрмæджытæ.
 
Бæрæгбон хорз хъуыддаг у, хорз мадзал у ирон æвзагæн уæлдай хатт æгъдау скæныны тыххæй. Фæлæ бæрæгбон куы ахицæн кæнæм, уæд та ралæууынц къаты бонтæ, ома кусгæ бонтæ. Æмæ, мæнмæ гæсгæ, ирон æвзаджы рæзтыл фылдæр кусын хъæуы къаты бонты, цæмæй йын йæ бæрæгбоныл бонæй-бон хуыздæр æвдисæнтимæ, хуыздæр æнтыстдзинæдтимæ æмбæлæм. Ницы аразынц ирон æвзаг парахат кæнын охыл, зæгъгæ, зæгъæн дæр нæй. Педагогон институты ЮНЕСКОйы кафедрæйы Хъамболты Тамерланы разамындæй сарæзтой ног полилингвалон (бирæвзагон) программæ æмæ уал æй фæлварынц хицæн скъолаты. Фæлæ куыд æрыхъуыстон, афтæмæй ирон æвзаджы чингуытæ сты тынг зынаргъ æмæ сæ бирæ ныййарджыты бон балхæнын нæу.

Афтæ мæм кæсы, æмæ ирон чингуытæ хъуамæ уой кæд бынтон лæвар нæ, уæддæр иннæ чингуытæй асламдæр. Иннæ ахæмæй нæ республикæйы хицау бардзырд радта, цæмæй байгом кæной ирон гимназ, ома, дам, нæ кæстæрты иронау дзурын сахуыр кæнæм. Хорз хъуыддаг у, бæгуыдæр, фæлæ иу гимназæй исты смæрздзыстæм? Цал сывæллоны бахаудзæн уыцы гимназмæ? Чи сæ ахуыр кæндзæн? Кæд æмæ сæ абон цы чингуытæ æмæ æрмæджытæ ис, уыдоны фæрцы сын амондзысты иронау дзурын, уæд уый у æнæпайда хабар.

Ахуырады æмæ наукæйы ног министр бауайдзæф кодта, ома, дам, ирон æвзаджы ахуыргæнджытæй бирæтæм фаг зонындзинæдтæ æмæ фæлтæрддзинад нæй. Раст у министр, фæлæ сæм цæй тыххæй нæй ахуыргæнджытæм уыцы хъæугæ зонындзинæдтæ? Ацы фарстыл дæсгай азты дæргъы дзурынц, фæлæ хъуыддаг размæ не ‘ггуырсы. Кæд бынтон раст нæ архайæм ацы фарстыл? Кæд фылдæр дзурын æмæ æвдисын хъæуы ирон радиобакастытæ æмæ ирон телеравдыстытæ. Кæд æмæ ирон радио æмæ ирон телеуынад фылдæр иронау хъуамæ дзуриккой.

Кæд æмæ Ирыстоны хицæуттæ арæхдæр ирон æвзагæй хъуамæ пайда кæниккой? А дыууæ боны федтон диссаджы хабар. Кæсын компьютеры, æмæ æвдисынц телебастдзинад Дзæуджыхъæу æмæ Турчы сæйраг сахар Анкараимæ. Ныхас кодтой ирæттæ ирон æвзаджы хъысмæтыл, æмæ мæнæ диссаг! — ирыстойнæгтæ баххуырстой тæлмацгæнæг, туркаг ирæттæ та дзырдтой иронау! Худинаг æмæ æрдиаг нæ национ хабæртты министры хæдивæгæн, кæд æмæ йæ бон иронау йæ хъуыдытæ зæгъын нæ баци. Дарддæр та чердæм у нæ фæндаг? Фæхæрдгæнæны хизæм æви уырдыджыты бынмæ айдзæгътам? Бæрæгбоны хорзæх уæ уæд, Ирыстоны адæм! Арфæгонд ут!


ФИДАРАТЫ Юри

Комментарии

Комментарии к данной статье отсутствуют

Добавить свой комментарий

Ваше имя:
Код:
Комментарий: