Æхсызгон æмæ зæрдылдарæн фембæлд (Газета «Пульс Осетии»№29, август 2016)

Æрæджы Дзæуджыхъæуы Национ наукон библиотекæйы «Кавказаг литературон цæлхæмбырд»-ы фæлгæты аивадон литературæйы кæсæн залы уыд фембæлд фыссæг, Мæхъæлы республикæйы культурæйы сгуыхт кусæг Лейла Тамасхановаимæ. Уый йемæ æрбахаста библиотекæйæн лæварæн сывæллæттæн сæхи мадæлон æмæ уырыссаг æвзæгтыл фыст чингуытæ.
Фембæлдмæ æрбацыд национ-культурон æхсæнад «Дай-мохк»-ы («Фыдыбæстæйы»-ы) сæрдар Магамед Гадаборшев, журналисттæ, культурæйы кусджытæ, ахуыргæнджытæ, музы-канттæ æмæ студенттæ. Лейла радзырдта йæ цард æмæ куысты тыххæй, бакастис йæхи фыст æмдзæвгæтæ.

«Кæд ныртæккæ экономикон уавæртæ кадавар сты чиныг рауадзынмæ, уæддæр республикæйы президент Юнус-Бек Евкуров стыр æргом здахы национ литературæйы райрæзтмæ, стæй райдайгæ æрыгон фысджыты архайдмæ. Республикæйы цы 450 мин адæймаджы цæры, уыдоны ‘хсæн ис 150 фыссæджы. Уый хорз нымæц у», — загъта Лейла.

Фæстаг азты Лейла стыр æххуыс кæны æрыгон курдиæттæн, ауды сыл зæрдæйæ. Уый разамынд дæтты литературон журнал «Литературная Ингушетия»-йæн.
Фембæлды хъуыстысты стыр уырыссаг æмæ кавказаг адæмты зындгонд поэтты æмæ фысджыты генион нæмттæ, скъуыддзæгтæ се ‘мдзæвгæтæй. «Александр Сергеевич Пушкин, Хетæгкаты Къоста, Бекмурза Пачев, Кязим Мечиев, Расул Гамзатов, Кайсын Кулиев, Алим Кешоков… Уыцы авторты уацмыстæ æмæ æмдзæвгæтæ сты нæ истори, нæ ивгъуыд, нæ æрвылбоны цард. Уыдон зонын хъæуы, уымæн æмæ æнæ ивгъуыд сомбонæн уæвæн нæй», — загъта Лейла Тамасханова йæ раныхасы.
Æхсызгонæй æрымысыд раздæры фысджыты фембæлдтытæ, стæй, фарон Турчы бæстæмæ горæт Трабзонмæ «Æппæтдунеон литературон фестивальмæ» Уæрæсейæ Кавказы цæрæг бирæ
нациты минæвæрттимæ цы балцы уыдысты, уыцы æнæферох-гæнгæ бонтæ.

Литературæ бирæ адæмты иу кæны йæ цæхæркалгæ бæрзонддзинадæй, йæ хъæздыг æмæ бирæвæрсыгдзинадæй, йæ æнæбын арф æмæ æгъуыстаджы тавсæй, йæ хъомыс æмæ ахъаззагдзинадæй.
Фембæлды уæвджытæ стыр бузныг загътой уазæг-фыссæг Лейла Тамасхановайæн, изæры аразæг Наталья Куличенкойæн æмæ библиотекæйы директор Хайманты Иринæйæн.


БЫЗЫККАТЫ Земфирæ

Комментарии

Комментарии к данной статье отсутствуют

Добавить свой комментарий

Ваше имя:
Код:
Комментарий: