Уæддæр чи стæм, цы стæм? (Газета “Пульс Осетии” № 18 от 14.05.2020 г.)

Алы нацийӕн дӕр йӕ бон у, стӕй хъуамӕ йӕхицӕн хӕсыл нымайа иннӕтыл ахуыр кӕнын. Карл Маркс Рагзамантӕй фӕстӕмӕ дӕр бӕллиццаг никуы уыди чысыл адӕмты хъысмӕт: тыхы дур хӕрдмӕ суры, зӕгъгӕ-иу уыцы ӕмбисонд сӕ сӕр баййӕфта. Тыхгӕнӕг та сын фылдӕр хатт стыр ӕмӕ хӕстмондаг адӕм уыдысты. Фӕлӕ национ химбарынад кӕмӕ уыди, сӕр сӕрмӕ чи хаста, уыцы этностӕ-иу цыфӕнды уавӕрты дӕр бынысӕфтӕй сӕхи бахъахъхъӕнын бафӕрӕзтой. Афтӕ рауади сӕ хабар словактӕн. ХVI ӕнусы Хуссар Словаки байста Османты импери. Словакты иннӕ хай та баци Габсбургты империйы. XVII ӕнусы кӕрон Словаки ӕнӕхъӕнӕй ссис Австро-Венгрийы дӕлбар. 1867 азы Австро-Венгрийӕ рауади дыууӕ монархийы – Австрийы ӕмӕ Венгрийы. Словакаг адӕмӕн уынаффӕгӕнӕг систы венгртӕ. Ӕмӕ кусӕндӕттӕй дӕр, стӕй астӕуккаг ӕмӕ уӕлдӕр скъолатӕй дӕр тард ӕрцыди сӕ мадӕлон ӕвзаг, венгриаг та ссис паддзахадон. Словакаг газеттӕ, журналтӕ нал уыди, мадӕлон ӕвзаг ма баззад ӕрмӕст бинонты ‘хсӕн. Ахӕм уавӕрты хъомыл кодта ӕрыгон поэт Павол Орсаг Гвездослав. Садзгӕ зонд ын йӕ сӕр сдзӕгъӕлтӕ кодта: ома словакаг ӕвзаг цауд у, венгриаг та – хъӕздыг, ахадгӕ. Мӕнӕ куыд фыста Гвездослав йӕхӕдӕг: «Венгриаг скъола мӕ къуырцдзӕвӕнмӕ батардта. Хъуыды кодтон венгриагау, тӕлмац дӕр кодтон уыцы ‘взагмӕ. Мишкольцы (венгриаг сахар. – Хъ. Ӕ.) ахуыр кӕнгӕйӕ мӕ хъуыдытӕ бынтондӕр ныссуйтӕ сты – иу словакаг дзырд дӕр дзы никуы фехъуыстон. Ӕмӕиу каникулты нӕхимӕ куы ссыдтӕн, уӕд мӕ ныййарджытимӕ ныхас кӕнын зынтӕй фӕрӕзтон». Ӕрыгон поэтӕн йӕ мадӕлон ӕвзагмӕ раздӕхынӕн феххуыс йӕ мад. Иуахӕмы та каникулты сӕхимӕ ссыд ӕмӕ йӕ хӕстӕджыты чындзӕхсӕвмӕ бахауд. Гъемӕ дын йӕ зӕрды куы ӕрӕфтид йӕ мӕлгъӕвзаг равдисын: уыцы сӕрыстырӕй венгриагау раныхас кодта. Йӕ мад ӕй афтӕмӕй куы федта, уӕд йӕ кӕуын нал баурӕдта. Павол хорзау нал уыд ӕмӕ, цы хабар у, зӕгъгӕ, афарста. Йӕ раздӕры ахуыргӕнӕг-словак ын уайдзӕфгӕнӕгау дзуапп радта: «Куыннӕ кӕуа дӕ мад, кӕд ӕмӕ дын дӕ ныхӕстӕй иу дӕр нӕ бамбӕрста. Ды дзырдтай ӕцӕгӕлон ӕвзагӕй, ӕцӕгӕлӕттӕн, цыма дӕхӕдӕг дӕр ӕцӕгӕлон дӕ, уыйау». Ныййарӕг мады къуыбар цӕссыгтӕ фенгӕйӕ, Гвездославы зӕрдӕ бындзарӕй ныррызт-нынкъуыст. Ӕмӕ поэтӕн йӕ дарддӕры цард бынтон ӕндӕр фӕндагмӕ рахызт. Йӕ уӕдыккон хъуыдытӕ ирдӕй равдыста ӕмдзӕвгӕ «Словакаг ӕвзагмӕ»-йы. Поэт иттӕг зӕрдӕргъӕвдӕй, удуӕлдайӕ бавнӕлдта йе ‘ппӕт тыхтӕ, йӕ цард ӕнӕхъӕнӕй дӕр йӕ адӕмӕн нывондӕн ӕрхӕссынмӕ. Фыццаджыфыццаг райдыдта йӕ мадӕлон ӕвзаг ахуыр кӕнын. Стыр ахъаз ын фесты словакаг поэттӕ Ян Коллары (1793– 1852), Андрей Сладковичы (1820–1872) ӕмдзӕвгӕтӕ, Людовит Штуры (1815– 1856) публицистикӕ. Павол Орсаг Гвездославы (1849–1921) царды хабӕрттӕ нын ракодта Михаил Зенкевич, зынгӕ уырыссаг поэт ӕмӕ тӕлмацгӕнӕг (кӕс чиныг: Гвездослав. Стихи.– М. Художественная литература, 1961). Алы дугты чи цард, ахӕм зондылӕгтӕ (райдай Платонӕй ӕмӕ фӕу нырыккӕттӕй), цыма ӕмдзырд бакодтой, уыйау нын ныууагътой иу ӕмбисонды хъуыды: «Дӕхӕдӕг дӕхиуыл куы фӕуӕлахиз уай, уӕд уый у ӕппӕты фыццаг ӕмӕ ӕппӕты ахъаззагдӕр уӕлахиз. Дӕхӕдӕг дӕхиимӕ хӕцгӕйӕ, састы бынаты куы баззайай, уӕд уымӕй та а дунейыл худинагдӕр ӕмӕ аллайагдӕр ницы ис». Гвездославмӕ ахӕм хъару разынд, ӕмӕ йӕхиимӕ тохы уӕлахиздзауӕй рацыди. Йӕ мады судзгӕ цӕссыгтӕ, йӕ мады рӕвдаугӕ ӕнгас ын фӕндагамонӕг стъалытӕ басгуыхтысты. Ӕмӕ райгуырдысты мӕнӕ ацы рӕнхъытӕ: Дӕ цӕстыты рӕвдаугӕ ‘нгас, мӕ мад, тынты ‘хсӕрдзӕнау батавта мӕ зӕрдӕ, мӕ рис мын систа, айсӕфта мӕ низтӕ, ӕвдадзы хос мын басгуыхти мыггагмӕ. О мады ныхас, фидыцтӕн сӕ уаздӕр, табуйаг рухс дӕ, цинты цин дӕ, фарн, сызгъӕрин кӕхц дӕ, цӕхх ӕмӕ кӕрдзын дӕ, зӕлдаг фӕлыст, ӕмбал кӕмӕн нӕй, ахӕм… Уӕд арфӕгонд, йӕ мады рухс кӕй тавы, хӕрзгӕнӕг зӕдау чи ‘рлӕууыд мӕ фарсмӕ! Ӕлгъыст фӕуӕд гадзрахат лӕг, ӕлгъаг, йӕ фыдӕлты ‘взаг чи акодта уӕй! Словактӕн фесӕфынӕй тас куы уыди, тыхджындӕр адӕмтӕ сӕ ассимиляци скӕнынмӕ куы хъавыдысты, уӕд сӕм разынди мидхъарутӕ (Гвездославы хуызӕттӕ), сӕхи ӕрӕмбӕрстой, зынгӕ ахуыргонд Михаил Казачков ЭКФ (этноконсолидацигӕнӕг фактор) кӕй хуыдта, уый сӕ туджы уыд ӕмӕ фервӕзтысты: ныртӕккӕ сын ис хицӕн паддзахад, сӕ адӕмы нымӕц хӕццӕ кӕны 8 милуанмӕ. «Хорз хъуыддӕгтӕ фӕзмгӕйӕ адӕймаг иудадзыг рӕзгӕ кӕны», – загъта францаг фыссӕг Ксанье Мармье. Ацы ныхӕстӕ канд хицӕн адӕймӕгтӕм нӕ хауынц, фӕлӕ ӕнӕхъӕн адӕмтӕм дӕр. Фӕлӕ ир ӕмӕ дыгур этноконсолидацигӕнӕг факторӕй ӕнӕхай сты ӕмӕ сӕфты къахыл уымӕн ӕрлӕууыдысты. Раджы райдыдтам иннӕ адӕмты ‘хсӕн тайын. Къоста ӕмӕ Секъа дзӕгъӕлы нӕ еусар кодтой («бӕрӕг дӕр нӕ нал и, цы стӕм», «фӕтайӕм, фӕтайӕм уалдзыгон митау, ӕртахгай лӕдӕрсы денджызмӕ нӕ уд»). Фӕлӕ ма Къоста ӕмӕ Секъайы рӕстӕджы уӕддӕр нӕ адӕм ирон ӕвзагыл нырӕй бирӕ ӕнувыддӕр уыдысты. Уымӕн хорз ӕвдисӕн у ахӕм хабар. 1906 азы «Ирон газет» куы фӕзынд, уӕд Гулиты Ефим афтӕ фыста: «Августы 2 бон Чъребайы (Цхинвал) изӕры 5 сахатыл райстам не ‘нхъӕлцау зынаргъ ирон газет. Стыр диссаг уыдис уыцы изӕр ирон адӕмы циндзинад! Зӕрдӕ пӕлхъ-пӕлхъ кодта, ӕддӕмӕ йӕхи тыдта фыр цинӕй… Иу ранмӕ бакӕс – иу къордӕй фӕрсынц нӕ хабартауӕджы; иу ӕрбазгъоры иннӕмӕ хӕрзӕггурӕггаг: уӕртӕ ӕрхӕццӕ газет!.. Згъордтой мӕм хӕлӕфӕй ӕмӕ скъӕфтой алырдӕм ирон газет. Тынгдӕр мын мӕ зӕрдӕ бауынгӕг кодта иу ӕмгар: раскъӕфта газет мӕ къухтӕй, фӕракӕс-бакӕс ӕм кодта, стӕй йын ныпъпъа кодта ӕмӕ загъта: «Ӕгас цу, ӕгас, мӕ зынаргъ ӕмбал». Ӕмӕ фырцинӕй йӕ цӕстысыг ӕркалдта… Бирӕ байуӕрстам алы адӕмӕн ӕмӕ цӕ фервыстам алы хъӕутӕм дӕр, бирӕйы зӕрдӕтӕ сӕрибар сулӕфыдысты газеты фендӕй…» («Ирон газет», 1906, №7). Иу 70 азы размӕ дӕр ма не ‘взаг ахӕм тӕссаг уавӕры нӕ уыд: адӕм ӕхсызгонӕй кастысты ирон чингуытӕ, журнал «Мах дуг», газеттӕ. Мӕ зӕрдыл ма абоны хуызӕн лӕууы, 1946 азы «Нарты кадджытӕ» фыццаг хатт джиппы уагъд куы ‘рцыдысты, уӕд сыл адӕм куыд хӕлоф кодтой, уый. Уӕд мӕныл фараст азы цыди. Бруты цардыстӕм. Нӕ хъӕуы иунӕг дукани уыд, ӕмӕ дзы сапӕттӕ, хъуымӕцтӕ, фӕтӕген ӕмӕ ӕндӕр товарты фарсмӕ уыди чингуытӕ дӕр, стӕй журнал «Мах дуг». Иуахӕмы хъӕуыл айхъуысти, райсом, дам, дуканимӕ «Нарты кадджытӕ» ӕрласдзысты. Сӕрд уыд, ӕмӕ дыккаг райсом адӕм боныцъӕхтыл (иу фондз сахатыл) дуканийы дуармӕ ӕрлӕууыдысты рады. Чингуытӕ бирӕ не ‘рластой – ӕдӕппӕт 7–8. Ӕмӕ дзы кӕмӕ не ‘рхауд, уыдон сӕ хӕдзӕрттӕм ӕнкъардӕй здӕхтысты. Уый фӕстӕ кадджыты чингуытӕ сыхӕйсыхмӕ, хӕдзарӕй-хӕдзармӕ цыдысты. Изӕрыгӕтты-иу бинонтӕ ӕрӕмбырд сты ӕмӕ иумӕ хъуыстой нӕртон гуыппырсарты диссӕгтӕм. Кӕсгӕ та сын сӕ фылдӕр скъоладзаутӕ кодтой – фӕтӕгены цырагъы рухсмӕ. Цалынмӕ-иу бинонтӕ чиныг кӕронмӕ нӕ бакастысты, уӕдмӕ сыхӕгтӕм не ‘нтыстис. Афтӕ иузӕрдион уыдысты уӕды фӕлтӕртӕ иннӕ ирон чингуытыл дӕр. Мадӕлон ӕвзаг ӕмӕ литературӕ нын скъолайы амыдта Кучиты Мария – парахатзӕрдӕ, рӕдау адӕймаг. Дзӕвгар ӕм уыд ирон чингуытӕ, иста журнал «Мах дуг» дӕр ӕмӕ нӕм-иу сӕ кӕсынмӕ радта. Хъуыды ма кӕнын: къухӕй-къухмӕ цыдысты 1949 азы уагъд «Ирон адӕмон сфӕлдыстад», стӕй Дӕбейы роман «Хъӕбатырты кадӕг» «Мах дуг» цы номырты мыхуыр кодта, уыдон ӕмӕ ӕндӕр чингуытӕ. Уӕд ирон ӕвзагӕн йӕ авналӕнтӕ парахат уыдысты: авдазон скъолайы уырыссаг ӕвзаг ӕмӕ литературӕйӕ фӕстӕмӕ ӕппӕт предметтӕ дӕр ахуыр кодтой иронау. Зӕрдӕ бындзарӕй ныккӕрзы, мах ӕмӕ абоны рӕзгӕ фӕлтӕры уавӕртӕ кӕрӕдзиуыл куы абарын, уӕд. Хӕсты фӕстӕ хус рӕстӕг скодта, адӕм тыхст ӕмӕ уырыдӕй цардысты, Къостайы загъдау, сӕ сихор, се ‘хсӕвӕр – сӕ мӕт, бызгъуырты цыдысты, ӕххормагӕйиу ныррӕсыдысты, уӕддӕр сӕ рох нӕ уыди уды хойраг ӕмӕ-иу сӕ мӕгуыр капеччытӕй чингуытӕн дӕр радих кодтой. Ныр ирон чиныг никӕйуал хъӕуы. 50–60 азмӕ цас къахдзӕфтӕ акодтой нӕ адӕм сыдзмыдзы! Цыма раст фӕстӕмӕдзу цӕрӕгой ракы фӕзмыдтой. «Ӕвзӕр йӕхимӕ къӕдзыгӕй ласы», – ахӕм ныхас фехъуыстон кӕддӕр иу ирон зӕронд усӕй ӕмӕ йӕ ныффыстон мӕ блокноты. Ус ӕй фыдуаг сывӕллоны тыххӕй загъта. Фӕлӕ ацы ныхас абоны ирӕттӕм тынгдӕр хауы. Мӕнӕ уын официалон хабар. Газет «Северная Осетия» 2018 азы 28 ноябры куыд фехъусын кодта, афтӕмӕй Цӕгат Кавказы республикӕты ‘хсӕн Ирыстон-Алани ахсы фыццаг бынат: карз нозтмӕ дзы махӕй ӕмхицдӕр ничи у. Уӕдӕ зӕххы куыстмӕ дӕр (ӕниу канд зӕххы куыстмӕ нӕ) цас зӕрдӕргъӕвд стӕм, уый алчидӕр зоны. Уыйхыгъд нӕ «хӕрзхъӕд» спъиртты кой ахъӕр ӕгас Уӕрӕсейыл дӕр. Зындгонд уӕрӕсейаг фыссӕг ӕмӕ философ Михаил Веллер мӕнӕ куыд зӕгъы йӕ иу чиныджы: «… жуликам из алкогольных мафий сам бог велел поставлять «виски» и «коньяк» из подпольного осетинского спирта, размешанного в ванне с водой, краской, сахаром и фруктовой эссенцией» (Веллер М. А вот и завтра.– М.: ЛитРес: Самиздат, 2019.– 20 ф.). Къорд хатты йӕ загътон, стӕй фыстон ӕмӕ та йӕ ногӕй зӕгъын: исты бӕллӕх ныл куы ‘рцӕуы, уӕд фыццаджы-фыццаг нӕхи аххос вӕййы. Ивгъуыд ӕнусы ӕхсайӕм азты ирон скъолатӕ сӕхгӕныны фарс чи дзырдта? Нӕ адӕм ахӕм цыбырзонд ӕмӕ стырзӕрдӕ, «рохгӕнаг» сты, ӕмӕ нӕ хицӕуттӕ ӕвзӕрӕй цы саразынц, уыдон сӕм нымады дӕр нал вӕййынц, фӕлӕ сӕ ӕппӕлынтӕ сисынц, сӕ нӕмттӕ сын сӕнусон кӕнӕм, зӕгъгӕ, сӕ удӕй бацӕуынц. Цӕуыл дзурӕг у уый? Ӕлгъаг цагъартӕ кӕй стӕм, ӕрмӕстдӕр ууыл. 1981 азы октябры нӕ республикӕйы цы ӕвирхъау змӕстытӕ ӕрцыд, уыдон адӕм, уӕлдайдӕр хистӕр фӕлтӕр, хорз хъуыды кӕнынц. Ӕниу не скӕсӕйнаг сыхӕгтӕн нӕ къаннӕг Ирыстоны зӕххытӕ, стӕй Дзӕуджыхъӕуы ӕмӕ районты тӕккӕ ӕфтиагджындӕр бынӕттӕ кӕй аххосӕй ныууӕйчынди? Нӕ хицӕутты! Ӕниу нын нӕ Иры дзыхъхъ маргтауӕг заводтӕ ӕмӕ алыхуызон куыстуӕттӕй чи байдзаг кодта? Мӕнӕ уыцы бӕллӕхты фӕстиуӕг: онкологион ӕмӕ ӕндӕр ӕбуалгъ низтӕй ӕппӕтӕй арӕхдӕр цы регионты сӕйынц, уыдоны ‘хсӕн ис Цӕгат Ирыстон. Ацы аз февралы газеты фӕзынд ахӕм информаци: «В Северной Осетии почва оказалась одной из самых загрязнённых в России… По информации Минприподы России основными факторами, оказывающими влияние на уровень загрязнения почв, стали увеличение образования отходов, выбросы предприятий металлургической, нефтеперерабатывающей и других отраслей промышленности, а также загрязнение бытовыми отходами территорий городов и поселков». Фӕдисы хъӕрау анӕрыдысты профессор Дзанайты Хадзымӕты ныхӕстӕ газет «Айдӕн»-ы (1918 азы №2): «Волосы встают дыбом и леденеет кровь от осознания того, какое общество мы построили, в каком обществе мы живём! (…) Дешёвая водка, пиво, вино, злачные, увеселительные заведения, «семейные сауны», отравленная окружающая среда, переполненные онкологические, неврологические, кардиологические больницы и отделения, разрастающиеся как на дрожжах кладбища, быть может, это исключительно наш удел?» Ӕмӕ ноджы: «… во Владикавказской котловине организован рукотворный могильник для многонационального народа Северной Осетии». «Фарны хабӕрттӕ» – афтӕ хуыйны Цӕгат Ирыстоны сӕйраг телеуынӕны равдыстытӕй иу. Уӕвгӕ дзы ницы уадиссаг фарны хабӕрттӕ вӕййы. Дӕ дзыпп куы амона, уӕд ӕхца бакал, ӕмӕ кӕд цӕстфӕлдахӕг кӕнӕ фӕхтылбадӕг куырысдзау дӕ, уӕддӕр дыл телеасыккӕй цӕппузырау ӕрттиваг ныхӕстӕ згъӕлын байдайдзысты, ӕмӕ дӕхимӕ зӕххы бикъ, комы дӕгъӕл ӕркӕсдзынӕ. Мах, ирон адӕм, цас цаудӕй-цауддӕр кӕнӕм, уыйас нӕхи тынгдӕр стауӕм: гени, титан, стъалы, Прометей-Амыран, пехуымпар, Уацилла, Уастырджи – ахӕм ӕрттиваг нӕмттӕ аныхасӕм, генийӕн йӕ уӕрагмӕ дӕр чи не ‘ххӕссы, уыцы дзигло-лӕгтыл. Уӕд таиу Къостайы зондамынд куы дариккам нӕ зӕрдыл: «Цӕстмӕхъус ныхас фыдбылыз хӕссы». Хи стауыны низӕй, ай-гъай, иннӕ адӕмтӕ дӕр фӕрынчын вӕййынц, фӕлӕ сӕм разыны ӕвронг зонды хицӕуттӕ ӕмӕ сын уыдон ӕргомӕй, карзӕй сӕ рӕдыд сӕ цӕстмӕ бадарынц. Уырысмӕ ахӕм ӕвронг зондыл хӕст адӕймаг уыди Петр Чаадаев – уый тыххӕй йӕм знаджы цӕстӕй кастысты национал-шовинисттӕ. Байхъусӕм поэт ӕмӕ критик Петр Вяземскиймӕ дӕр: «Мы удивительные самохвалы, и грустно то, что в нашем самохвальстве есть какой-то холопский отсед» (Вяземский П. Старая записная книжка.– Санкт-Петербург: Азбука, 2012). Нӕ эрӕйы агъоммӕ ромаг стыр поэт Вергили йӕ мӕлӕты размӕ ныффӕдзӕхста, цӕмӕй йын йӕ ӕвӕджиау эпопейӕ «Энеидӕ» фесафой: автор дзы разы нӕ уыд, нымадта йӕ, кӕронмӕ фыст чи нӕ фӕцис, ахӕм уацмысыл. Уӕдӕ йӕ райгуырдыл 700 азӕй фылдӕр кӕмӕн сӕххӕст, уыцы разагъды Петраркӕ дӕр йӕхи уӕлиау никуы ӕвӕрдта, гуырысхойаг, дам, у, мӕ ницӕйаг ӕмӕ сау ном тыгъдад ӕмӕ рӕстӕджы ‘хсӕнты дард ахӕццӕ уа, уый. Ӕз дӕр, дам, уӕ рӕгъауӕй иу дӕн, тӕригъӕддаг, нӕдӕр тынг кадджын, нӕдӕр тынг ныллӕг мыггагӕй рацӕугӕ. Ӕниу-ма байхъусӕм, уырысы гени Лев Толстой йӕ уацмысты тыххӕй цытӕ фыста, уымӕ: «… Какова мерзость и плоская мерзость вышла моя статья («Люцерн») в печати и при перечтении. Я совершенно надул себя ею да и вас, кажется». Ацы ныхӕстӕ ист сты, Николай Некрасовмӕ 1857 азы октябры 2-ӕм бон цы фыстӕг арвыста, уырдыгӕй. В. Боткинмӕ та 1859 азы 5 майы Толстой афтӕ фыста: «Что я наделал с своим «Семейным счастьем». Только теперь здесь, на просторе, опомнившись, … я увидел, какое постыдное г…о, пятно, не только авторское, но и человеческое – это мерзкое сочинение… Я теперь похоронен и как писатель, и как человек!» Ӕппӕтӕй стырдӕр дисы та нӕ бафтауы, ацы титан йӕ шедевртӕ «Война и мир», «Аннӕ Каренина» ӕмӕ «Воскресение»- йыл фӕстагмӕ былысчъилтӕ кӕнын кӕй байдыдта, уымӕй. Фыццаг роман рахуыдта многословная дребедень, дыккаг – мерзость, ӕртыккаджы тыххӕй та афтӕ фыста: «… то произведение так слабо и попросту плохо и бесполезно, что ни в коем случае его не напечатаю» (Толстой Л. Об искусстве и литературе.– М.: Советский писатель, 1958.– С. 498). Цӕвиттон, адӕймаг зонд ӕмӕ зӕрдӕйӕ цас хъӕздыгдӕр уа, уыйас хӕдӕфсармдӕр у, йӕхицӕй фылдӕр домы, ӕмӕ уый руаджы бафты йӕ къухы егъау ӕнтыстытӕ. Курдиатӕй цух ӕнӕджелбетт та, айк мӕцъисӕй фӕлдахӕгау, цыдӕрмыдӕртӕ «сфӕлдисы», стӕй бӕстыл ныцциц-циц кӕны. Курдиат ӕм кӕй нӕй, уыцы сахъат та йын йӕ хӕрзгӕнджытӕ, Станислав Ежи Лецы загъдау, литературон премитӕй баххӕст кӕнынц. Диссаг та куыннӕ у, стыр диссаг: бирӕ дӕсгай азты дӕргъы нӕ мадӕлон ӕвзаг нӕ къӕхты бын ссӕстам, нӕхицӕй уӕрӕседзаутӕ ӕмӕ ӕндӕр «дзаутӕ» арӕзтам, национ скъолайыл цӕнгӕт дуӕрттӕ бассыдтам, ныр иумӕйагахуырадон скъола кӕй хонынц, уым та нӕм ирон ӕвзаг амоныны хъуыддӕгтӕ нымады дӕр не сты, цыбыр дзырдӕй, нӕ къухтӕ нӕ дӕлӕрмтты бакодтам, исты байтауын нӕ фӕсонӕрхӕджы дӕр нӕ уыди, нӕ хуымтӕ сзӕрӕстон сты, бӕхсындз ӕмӕ дзы гӕрзӕхсӕн ӕлдариуӕг кӕнынц. Ӕмӕ ныр, ӕрӕджиау, ног ӕвзартӕ, ома ӕрыгон ирон фысджытӕ агурӕм! Зри в корень, зӕгъгӕ, Козьма Прутковы фӕдзӕхст нӕ зӕрдыл куы дардтаиккам ӕмӕ йӕ куы ӕххӕст кодтаиккам, уӕд ахӕм заууаты уавӕрмӕ не ‘рхаудаиккам. Чи цы кӕны, уый – йӕхицӕн… Ӕмӕ та бар-ӕнӕбары райгуырынц ӕнкъард хъуыдытӕ: Нӕ ивгъуыд заман, абоны бон, сом, нӕ тъымы-тъыма… Систы нын ӕргъом, уӕззау ӕргъом. Химерӕтау нӕ ‘взонынц. Цы ма нын баззад а зӕххыл? Фыдном! Ӕгъуыссӕг ӕхсӕвтӕ мын ласынц мӕ уд: цӕстфӕлдахӕг дуджы фыдазар ныссӕста мӕ цинтӕ, мӕ мидбылты худт, мӕ арв дӕр ныммӕстӕг и, батар. Ӕнӕбары цардӕй, мӕ тыхст уд, цӕрӕм. Нӕ хорз дӕр ӕвзӕрӕй фӕивддзаг. Кӕй ацыди ме ‘ууӕнк мӕ разӕй мӕрдтӕм, гъеуый у мӕ риссӕгты риссаг. 2019

Комментарии

Комментарии к данной статье отсутствуют

Добавить свой комментарий

Ваше имя:
Код:
Комментарий: